“Нэг бүс нэг зам” сэдэвт  үзэсгэлэн Улаанбаатар хотноо болж өндөрлөлөө

10 сарын 12-ны өдөр “Нэг бүс нэг зам” сэдэвт олон улсын уран бүтээлчдийн хамтарсан үзэсгэлэн  Монголын урчуудын эвлэлийн үзэсгэлэнгийн танхимд зохион байгуулагдлаа. Энэхүү үзэсгэлэн өмнө нь Хятад-Францын соёл солилцооны нийгэмлэгийн хамтын ажиллагааны хүрээнд Франц улсын нийслэл Парисхот, БНХАУ-ын ӨМӨЗО-ны Хөх хотод зохион байгуулагдаж байжээ.

Олон улсын уран бүтээлчдийн хамтарсан үзэсгэлэнг МУЭ-ийн хорооны дэмжлэгтэйгээр Хятад-Францын урлагийн солилцооны нийгэмлэг, Туурай Тамгат нутаг компаниуд хамтран зохион байгуулсан. Мөн тус үзэсгэлэнд Монгол, Хятад, Франц, Итали, Испани,Герман 6 улсын уран бүтээлчид оролцлоо.

Үзэсгэлэнгийн нээлтэнд МУЭ-ийн хорооны ерөнхийлөгч Баатар, БСШУС-ын яамны соёлын бодлого хариуцсан дарга Болд, БНХАУ-аас МУ-д суугаа Элчин сайдын яамны соёлын зөвлөхбөгөөд Улаанбаатар дахь Хятадын соёлын төвийн дарга Ли Вэй нар оролцож үгхэллээ.